راس الخیمہ میں7 سالہ بچہ ٹریفک پولیس افسر بن گیا

راس الخیمہ (روزنامہ یوکے ٹائمز) متحدہ عرب امارات میں ایک 7 برس کے بچے کا ٹریفک پولیس افسر بننے کا خواب پورا ہو گیا۔ امارت نے ننھے عبداللہ حمد الکتبی کو امارت کی ایک شاہراہ پر ٹریفک کنٹرول کرنے کی اجازت دے دی۔
عبداللہ نے راس الخیمہ پولیس کے ٹریفک افسران اور اہل کاروں کی ٹیم کے زیر نگرانی پورے ایک گھنٹے تک گاڑیوں کی نقل و حرکت کو سنبھالا۔اپنا خواب پورا کرنے کے کیلئے عبداللہ نے لیفٹیننٹ کے منصب کے افسر کی سرکاری وردی پہنی جو عبداللہ کے والد نے ذاتی طور پر اْس کے لیے تیار کروائی تھی۔راس الخیمہ کے محکمہ پولیس کے ارکان کی جانب سے عبداللہ کو ٹریفک پولیس کی ذمے داریوں اور گاڑیوں ، ڈرائیوروں اور سکول بسوں کے حوالے سے لازمی اقدامات کے بارے میں آگاہ کیا گیا جبکہ اس موقع پر راس الخیمہ پولیس میں سینٹرل آپریشنز کے ڈائریکٹر جنرل محمد سعید الحمیدی نے مستقبل میں عبداللہ حمد الکتبی کے ٹریفک کے شعبے میں کام کرنے کے حوالے سے اپنی نیک تمناؤں کا اظہار کیا۔